ប៉ូលិសចរាចរណ៍ខ្មែរ ប្រើអំពើហិង្សារងការរិះគន់ យ៉ាងចាស់ដៃ
សូម post ម្តង់ទៀត ព្រោះល្ងាចមិញឈរថតពួកវាទាំង
ហេតុការណ៍នេះ អ្នកវិភាគសង្គមបានអះអាងថា គឺបណ្ដាលមកពីការអប់រំនៅមានកម្រិត រវាងអ្នកគោរពច្បាប់ និងអ្នកអនុវត្តន៍ច្បាប់។ ម៉្យាងវិញទៀត អ្នកអនុវត្តន៍ច្បាប់មួយចំនួន អាចយកច្បាប់ចរាចរណ៍ធ្វើជាមុខរបរសម្រាប់ផលប្រយោជន៍បុគ្គល។
ការផាកពិន័យទៅលើប្រជាពលរដ្ឋជាអ្នកធ្វើដំណើរ អាចក្លាយជាមុខរបរមួយសម្រាប់ប៉ូលិសចរាចរមួយចំនួន ហើយការផាកពិន័យនោះអាចកើតឡើងដោយសារអ្នកធ្វើដំណើរអត់មួក អត់កញ្ចក់ ឬបើកភ្លើងពេលថ្ងៃ ហើយដំណើរការនៃការផាកពិន័យនោះប្រព្រឹត្តទៅដោយគ្មានវិក្កយបត្រ។ ម៉្យាងវិញទៀត យន្តការផាកពិន័យដោយគ្មានវិក្កយបត្រ ក៏បានបង្កឲ្យមានអំពើហិង្សាកើតឡើងដែរ រវាងមន្ត្រីប៉ូលិសចរាចរ និងអ្នកធ្វើដំណើរ ដែលយល់ដឹងអំពីច្បាប់ចរាចរណ៍នៅមានកម្រិត។
អ្នកវិភាគសង្គម លោក កែម ឡី មានប្រសាសន៍ថា ដើម្បីកែប្រែអាកប្បកិរិយាទាំងនោះ មានកត្តាជាច្រើនដែលត្រូវតែដោះស្រាយ ដូចជាការធ្វើជាគំរូល្អនៃអ្នកដែលអនុវត្តន៍ច្បាប់ ឬអ្នកមានអំណាច ត្រូវតែគោរពច្បាប់ចរាចរណ៍ និងប្រសិទ្ធភាពអនុវត្តន៍ច្បាប់ឲ្យបានគ្រប់ជ្រុងជ្រោយរវាងប្រជារាស្ត្រសាមញ្ញ និងមន្ត្រីមានឋានៈខ្ពស់ជាដើម។
លោក កែម ឡី មានប្រសាសន៍បន្ថែមថា កត្តាមួយទៀតដែលជំរុញឲ្យមានគោរពច្បាប់ចរាចរណ៍ ដើម្បីជៀសវាងអំពើហិង្សានានាដែលកើតឡើងរវាងមន្ត្រីប៉ូលិសចរាចរ និងប្រជាពលរដ្ឋ គឺត្រូវលើកកម្ពស់ការអប់រំ។
ប្រធានកម្មវិធីសុវត្ថិភាពចរាចរណ៍ របស់អង្គការជនពិការអន្តរជាតិបែលហ្សិក លោក អ៊ា ចរិយា ការផ្ទុះអំពើហិង្សាទៅលើការធ្វើចរាចរណ៍ បណ្ដាលមកពីការយល់ដឹងរបស់ប្រជាពលរដ្ឋនៅមានកម្រិតអំពីការផាកពិន័យ។ ម៉្យាងវិញទៀត គឺបណ្ដាលមកពីប្រជាពលរដ្ឋទាំងនោះយល់ថា ការផាកពិន័យមិនបានចូលទៅថវិកាជាតិ។
លោក អ៊ា ចរិយា មានប្រសាសន៍បន្ថែមអំពីយន្តការដោះស្រាយបញ្ហានេះស្រដៀងគ្នាទៅនឹងអ្នកវិភាគសង្គមដែរ គឺការអប់រំប្រជាពលរដ្ឋឲ្យយល់ដឹងអំពីការផាកពិន័យ គឺជាការចាំបាច់ ដើម្បីឈានដល់ការធ្វើដំណើរត្រឹមត្រូវទៅតាមច្បាប់ចរាចរណ៍នៅក្នុងប្រទេស។
ទោះជាយ៉ាងណា ការយល់ដឹងតិចតួចនេះ បានជំរុញធ្វើឲ្យអ្នកដំណើរមួយចំនួន បានបង្កហិង្សារវាងប៉ូលិសចរាចរ ដែលគាត់មិនយល់ព្រមទៅតាមការផាកពិន័យស្របទៅតាមច្បាប់។
ប្រធានការិយាល័យនគរបាលចរាចរណ៍ផ្លូវគោក រាជធានីភ្នំពេញ លោក ហេង ចាន់ធារី មានប្រសាសន៍ថា តាមច្បាប់ ករណីដែលយកម៉ូតូទៅប៉ុស្តិ៍ គឺយានយន្តនោះគ្មានស្លាកលេខ ឬស្លាកលេខក្លែងក្លាយ ហើយក្នុងករណីម៉ូតូដែលគ្មានកញ្ចក់ ឬគ្មានពាក់មួកសុវត្ថិភាព ឬបើកភ្លើងពេលថ្ងៃ គឺមិនទាមទារយកម៉ូតូនោះទៅប៉ុស្តិ៍ឡើយ ហើយការផាកពិន័យ គឺធ្វើនៅនឹងកន្លែង។ លោកបញ្ជាក់ទៀតថា ប្រសិនបើប៉ូលិសចរាចរធ្វើការផាកពិន័យដោយមិនត្រឹមត្រូវ ប្រជាពលរដ្ឋអាចប្ដឹងទៅការិយាល័យចរាចរណ៍ផ្លូវគោក។
លោក ហេង ចាន់ធារី មានប្រសាសន៍បន្ថែមទៀតថា ការជៀសវាងការផាកពិន័យប្រជាពលរដ្ឋដែលជាអ្នកបើកបរ ជាពិសេសម៉ូតូ ថាច្បាប់តម្រូវឲ្យមានអ្វីខ្លះ ដូចជាពាក់មួកសុវត្ថិភាព កញ្ចក់ ជាដើម ដើម្បីការពារសុវត្ថិភាពផ្ទាល់ខ្លួន។
ទោះជាណាក៏ដោយ ការផាកពិន័យលើការធ្វើចរាចរណ៍តាមដងផ្លូវសាធារណៈ ជាពិសេសអ្នកបើកបរម៉ូតូដែលបើកភ្លើងពេលថ្ងៃ គ្មានកញ្ចក់ គ្មានពាក់មួកសុវត្ថិភាពជាដើម ក៏បានឈានដល់ការប្រើអំពើហិង្សា។ អំពើហិង្សានេះ អាចកើតឡើងរវាងប្រជាពលរដ្ឋទៅលើមន្ត្រីចរាចរ ដែលចាប់ផាកពិន័យខ្លួន ឬមន្ត្រីចរាចរបានប្រើហិង្សាទៅលើប្រជាពលរដ្ឋ ហើយព័ត៌មាននេះត្រូវបានផ្សព្វផ្សាយយ៉ាងទូលំទូលាយនៅក្នុងបណ្ដាញសង្គមហ្វេសប៊ុក។
ហេតុការណ៍មួយដែលបានដកស្រង់ចេញពីបណ្ដាញសង្គមនោះ ដោយមានស្ត្រីម្នាក់បានរងគ្រោះជាំមុខ និងដៃជើងជាច្រើនកន្លែង ដោយសារតែប៉ូលិសល្បាតវាយ ដោយសារតែជិះម៉ូតូអត់ពាក់មួក ម៉ូតូអត់កញ្ចក់។ ហេតុការណ៍នោះ បានបង្កឲ្យសាធារណជនខឹងសម្បារយ៉ាងខ្លាំងចំពោះការប្រព្រឹត្តនោះ។
ទោះជាយ៉ាងណា ហេតុការណ៍ដោយឡែកមួយទៀត ក៏បានផ្សព្វផ្សាយស្រដៀងគ្នានេះដែរ ដោយប៉ូលិសចរាចរបានចាប់អូសម្ចាស់ម៉ូតូម្នាក់ផ្ដួលបោកទៅនឹងដី នៅពេលដែលគាត់បានព្យាយាមរារាំងមិនអនុញ្ញាតឲ្យប៉ូលិសយកម៉ូតូរបស់គាត់។
បញ្ហានេះ ប្រធានការិយាល័យចរាចរណ៍ផ្លូវគោក លោក ហេង ចាន់ធារី មានប្រសាសន៍ថា បានចាត់វិធានការរួចរាល់ហើយ ដោយលោកបញ្ជាក់ថា ការអនុវត្តគឺទាមទារឲ្យប្រជាពលរដ្ឋចូលរួម មិនមែនប្រើហិង្សាទេ។
ទោះជាយ៉ាងនេះក្ដី អ្នកវិភាគសង្គមមួយចំនួនបានអះអាងថា អ្នករងគ្រោះមានសិទ្ធិប្ដឹងប៉ូលិសចរាចរ ដែលបង្កហិង្សា ប៉ុន្តែពេលខ្លះមិនឈានដល់ការប្ដឹងទេ ដោយសារតែអ្នកបើកបរខ្លួនឯងជាអ្នកប្រព្រឹត្តខុសច្បាប់ចរាចរណ៍។ អ្នកវិភាគសង្គមបានបញ្ជាក់ថា អ្នកដំណើរធ្វើខុសច្បាប់ចរាចរណ៍ គឺអាចខុសត្រង់ច្បាប់រដ្ឋប្បវេណី មានន័យថា ត្រឹមតែផាកពិន័យជាលុយកាក់ប៉ុណ្ណោះ ប៉ុន្តែអ្នកបង្កហិង្សាវិញ ជាអ្នកធ្វើខុសច្បាប់ព្រហ្មទណ្ឌ ដែលប្រឈមនឹងការផាកពិន័យ រួមទាំងការដាក់ពន្ធនាគារ៕
