នយោបាយ Update

អ្នកសង្កេតការណ៍ឯករាជ្យមួយចំនួនបានរិះគន់ថា
ហ៊ុន សែន និងមន្ត្រីជាន់ខ្ពស់គណបក្សប្រជាជនព្រួយបារម្ភយ៉ាងខ្លាំងចំពោះសន្ទុះគាំទ្រគណបក្សសង្គ្រោះជាតិ ដែលមានលោក សម រង្ស៊ី ជាប្រធាន ព្រោះមួយរយៈពេលចុងក្រោយនេះប្រជាពលរដ្ឋខ្មែរនៅទូទាំងប្រទេសហាក់ដូចជាអស់ជំនឿលើគណបក្សប្រជាជនរួចទៅហើយ។ ដោយព្រួយបារម្ភចំពោះប្រជាប្រិយភាពរបស់លោក សម រង្ស៊ី ទើបគណបក្សកាន់អំណាចប្រើមធ្យោបាយមិនសុចរិតរារាំងមិនឱ្យលោក សម រង្ស៊ី អាចចូលរួមបោះឆ្នោត និងឈរឈ្មោះឱ្យគេបោះឆ្នោតនៅថ្ងៃទី២៨ ខែកក្កដា ឆ្នាំ២០១៣ ឆាប់ៗខាងមុខ។ ជាក់ស្តែង គ.ជ.ប ដែលមានលោក អុឹម សួស្តី និងជាប្រធាន និងលោក ទេព នីថា ជាអគ្គលេខាធិការបានសម្រេចលុបឈ្មោះលោក សម រង្ស៊ី ចេញពីបញ្ជីឈ្មោះអ្នកបោះឆ្នោត ដោយមិនខ្វល់ពីការរិះគន់អ្វីទាំងអស់ ដោយយកលេសថាលោក សម រង្ស៊ី គឺជាទណ្ឌិតមិនអាចចូលរួមបោះឆ្នោតបានឡើយ។ យុទ្ធសាស្ត្ររបស់លោកនាយករដ្ឋមន្ត្រី ហ៊ុន សែន បែបនេះហើយទើបលោក សម រង្ស៊ី ជាមេដឹកនាំគណបក្សជំទាស់ដ៏សំខាន់រិះគន់ថា លោក ហ៊ុន សែន ជាមនុស្សកំសាកញី មិនហ៊ានប្រកួតប្រជែងប្រកបដោយតម្លាភាពសម្រាប់ការបោះឆ្នោតជ្រើសតាំងតំណាងរាស្ត្រនីតិកាលទី៥ នៅចុងខែកក្កដាខាងមុខ។
ក្រុមមន្ត្រីអង្គការក្រៅរដ្ឋាភិបាលដែលឃ្លាំមើលការបោះឆ្នោតក្នុងប្រទេសកម្ពុជាបានកត់សម្គាល់ថាប៉ុន្មានខែកន្លងទៅនេះអង្គការសហប្រជាជាតិ សហរដ្ឋអាមេរិក សហភាពអឺរ៉ុប និងប្រទេសបារាំងជាដើម ចង់ឃើញការបោះឆ្នោតក្នុងប្រទេសកម្ពុជាប្រព្រឹត្តទៅដោយសេរី ត្រឹមត្រូវ និងយុត្តិធម៌ ស្របតាមគោលការណ៍ប្រជាធិបតេយ្យសេរីពហុបក្ស។ ជាក់ស្តែងក្នុងដំណើរទស្សនកិច្ចមកកាន់ប្រទេសកម្ពុជាកាលពីថ្ងៃទី១៩ ខែកុម្ភៈ ឆ្នាំ២០១៣ លោក ម៉ៃខល ផូសនើ ឧបការីរដ្ឋមន្ត្រីក្រសួងការបរទេសសហ រដ្ឋអាមេរិក បានជំរុញឱ្យរដ្ឋាភិបាលកម្ពុជាលើកលែងការចោទប្រកាន់លើ លោក សម រង្ស៊ី មេដឹកនាំបក្សប្រឆាំងដ៏សំខាន់ ដើម្បីឱ្យលោក សម រង្ស៊ីអាចចូលរួមពេញលេញក្នុងការបោះឆ្នោត។ ប៉ុន្តែរដ្ឋាភិបាលលោកហ៊ុនសែន បានច្រានចោលសំណើរបស់សហរដ្ឋអាមេរិក ដោយឆ្លើយតបថាកម្ពុជាមិន អាចធ្វើតាមសំណើរបស់សហរដ្ឋអាមេរិកបានទេ ព្រោះប្រទេសកម្ពុជាមានអធិបតេយ្យភាពជាតិ និងអនុវត្តន៍តាមច្បាប់របស់ខ្លួន។ ការបដិសេធទៅ នឹងសំណើរបស់សហរដ្ឋអាមេរិកត្រូវបានក្រុមអ្នកវិភាគស្ថានការណ៍សម្តែងនូវសេចក្តីព្រួយបារម្ភថា រដ្ឋាភិបាលលោក ហ៊ុន សែន កំពុងប្រឈមមុខជា មួយសហរដ្ឋអាមេរិក និងសហគមន៍អន្តរជាតិ ហើយថាលទ្ធិប្រជាធិបតេយ្យក្នុងប្រទេសកម្ពុជាកំពុងប្រឈមនឹងគ្រោះថ្នាក់យ៉ាងធ្ងន់ធ្ងរ។