កុមារីកម្ពុជាម្នាក់ សម្តែងភាពយន្តឯកសារខ្នាតអន្តរជាតិ Girl Rising ដែលមាន៩ប្រទេសចូលរួម

ប្រភព CEN
ភ្នំពេញ: ភាពយន្ត​ឯកសារ​ខ្នាត​អន្តរជាតិ ដែលមាន​ចំណងជើង​ថា Girl Rising ជា​ភាពយន្ត​ថ្មី​សន្លាង​មួយ សម្រាប់​ពានរង្វាន់ អាកា​ដឺ​មី (Academy Award) ក្នុងនោះ កុមារី​ជនជាតិ​កម្ពុជា​ម្នាក់ បាន​ចូលរួម​សម្តែង​ជាមួយ​កុមារី ដែល​មកពី​៩ ប្រទេស​ផ្សេងទៀត​។
​ខ្សែភាពយន្ត​ខ្នាត​ធំ​ដែលមាន​ចាក់​បញ្ចាំង​លើ​កញ្ចក់​ទូរទស្សន៍ CNN ដែរនោះ នឹង​ចាក់ផ្សាយ​នៅ​ថ្ងៃ​អង្គារ​ទី​២ ខែកក្កដា ឆ្នាំ​២០១៣ ពី​ម៉ោង​៦​ល្ងាច ដល់​៩ :00 យប់ នៅ​រោងភាពយន្ត​របស់​វិទ្យាស្ថាន​បារាំង​។ នេះ​បើ​យោងតាម​សេចក្តីប្រកាស​ព័ត៌មាន​របស់​អ្នករៀបចំ​កម្មវិធី​។
​តាម​ប្រភព​បាន​ឲ្យ​ដឹងថា សាច់​រឿងនេះ បង្ហាញ​អំពី​ឥទ្ធិពល​នៃ​ការអប់រំ​ក្នុងការ​ផ្លាស់ប្តូរ​កុមារី ក៏ដូចជា​ពិភពលោក ។ ភាពយន្ត​នេះ នាំមក​ជូន ដោយ​យុទ្ធនា​ការគាំទ្រ​ការអប់រំ សម្រាប់​កុមារី ហៅថា ១០x១០ ក្រុមហ៊ុន​សាជីវកម្ម Intel និង​ផលិតកម្ម CNN​។​
​    ​

​សុខា បាន​និយាយថា “​វា​មិនមែនជា​ការបញ្ចប់​ទេ ប៉ុន្តែ​វា​គ្រាន់តែ​ជាការ​ចាប់ផ្តើម​ប៉ុណ្ណោះ​” ។ សុខា គឺជា​កុមារ​កម្ពុជា នៅ​កន្លែង​ចាក់សំរាម​។ នាង​គឺជា​ក្មេង​កំព្រា ដែល​ត្រូវ​បង្ខំចិត្ត​ដើរ​រើស​របស់របរ​នៅក្នុង​គំនរ​សំរាម ដើម្បី​រស់ ប៉ុន្តែ​ដោយ​ធ្លាប់​ឆ្លងកាត់​អព្ភូតហេតុ​ជាច្រើន សុខា​ក៏បាន​ស្វែង​រកឃើញ​ផ្លូវ​របស់​នាង ដោយបាន​ចូលរៀន​នឹង​គេ​។ ហើយ​នាង​ក៏បាន​ក្លាយជា​សិស្ស​ពូកែ នៅ​ចំណុច​នៃ​អនាគត​ដ៏​អស្ចារ្យ​ដែល​នឹកស្មាន​មិន​ដល់​។​
​ភាពយន្ត​នេះ និយាយ​អំពី​ជីវិត​កុមារី ៩​រូបមកពី ៩​ប្រទេស រួមមានៈ ១-​ប្រទេស កម្ពុជា សំដែង​ដោយ កុមារី សុខា , ២-​ប្រទេស ឥណ្ឌា​, 3-​ប្រទេស​នេ​ប៉ាល់​, ៤-​ប្រទេស អេ​ហ្ស៊ី​ប​, ៥-​ប្រទេស ប៉េ​រូ​, ៦-​ប្រទេស​អេ​ត្យូ​ពី​, ៧-​ប្រទេស​អា​ហ្វ​ហ្គា​នី​ស្ថាន​, ៨-​ប្រទេស ហៃ​ទី​, ៩-​ប្រទេសសៀ​រ៉ា​ឡេ​អូន និង​ឆ្លុះបញ្ចាំង​នូវ​ឥទ្ធិពល​ការអប់រំ​ទៅលើ​សហគមន៍​ប្រទេស ក៏ដូចជា​ពិភពលោក​៕